پروفیسر رشید احمد — شانِ ساہیوال

پروفیسر رشید احمد ساہیوال میں شارٹ ہینڈ اور ٹائپنگ کی تعلیم کے حوالے سے بابائے شارٹ ہینڈ کہلاتے تھے۔ وہ 1942ء میں جالندھر میں پیدا ہوئے اور تقسیم کے بعد اپنے والد چوہدری شاہ محمد کے ساتھ ساہیوال کے قریب چک 2/10 عباس پور آ گئے۔

انہوں نے ننکسار گورنمنٹ اسکول ہڑپہ، گورنمنٹ ہائی اسکول ساہیوال اور گورنمنٹ پوسٹ گریجویٹ کالج ساہیوال سے تعلیم حاصل کی۔ یونین کونسل 6/11-L کے سیکرٹری کی حیثیت سے عملی زندگی شروع کی، استاد محمد بخش ملتانی سے شارٹ ہینڈ اور ٹائپنگ سیکھی، واپڈا ہاؤس لاہور میں سٹینوگرافر رہے اور گورنمنٹ کامرس کالج ساہیوال میں تدریس کی۔

انگریزی، شارٹ ہینڈ اور ٹائپنگ کے ماہر استاد کی حیثیت سے انہوں نے سینکڑوں طلبہ تیار کیے۔ 2002ء میں ریٹائرمنٹ کے بعد آئیڈیل کالج آف کامرس اور رشید سٹینوگرافرز اکیڈمی قائم کی، جہاں سے تربیت پانے والے افراد سپریم کورٹ، ہائی کورٹس، ماتحت عدالتوں، نیب، ایف آئی اے، الیکشن کمیشن، نادرا اور بیرون ملک خدمات انجام دے رہے ہیں۔ پروفیسر رشید احمد جنوری 2023ء میں وفات پا گئے اور ساہیوال میں مدفون ہوئے۔