ساہیوال میں سی ٹی ڈی کی کارروائی، دو مشتبہ افراد گرفتار؛ 4 کلو دھماکہ خیز مواد برآمد

ساہیوال میں کاؤنٹر ٹیررازم ڈیپارٹمنٹ (سی ٹی ڈی) نے کارروائی کرتے ہوئے کالعدم تحریک طالبان فتنۃ الخوارج سے وابستہ ہونے کے الزام میں دو مشتبہ افراد کو گرفتار کرنے کا دعویٰ کیا ہے۔

اردو پوائنٹ اور این این آئی کی رپورٹ کے مطابق کارروائی ساہیوال ملتان روڈ پر خوشی ولاز، فتو موڑ کے قریب کی گئی۔ سی ٹی ڈی کے مطابق گرفتار افراد کے قبضے سے تقریباً 4 کلوگرام دھماکہ خیز مواد، ایک آئی ای ڈی، ڈیٹونیٹرز، الیکٹرک سرکٹ اور دیگر تخریبی سامان برآمد ہوا۔

رپورٹ کے مطابق گرفتار افراد کی شناخت مہتاب احمد اور محمد شاہد گل کے نام سے ہوئی ہے۔ انسداد دہشت گردی عدالت ساہیوال نے دونوں کا سات روزہ جسمانی ریمانڈ منظور کرتے ہوئے انہیں سی ٹی ڈی کے حوالے کیا، جبکہ مزید تفتیش جاری ہے۔

ساہیوال ٹائمز وضاحت کرتا ہے کہ یہ خبر متعلقہ ادارے کے دعوے اور دستیاب رپورٹ کی بنیاد پر شائع کی جا رہی ہے؛ مقدمے اور الزامات کا حتمی فیصلہ عدالت کرے گی۔

ماخذ: اردو پوائنٹ / این این آئی

https://www.urdupoint.com/pakistan/news/sahiwal/national-news/live-news-4943888.html